Dili, 04 Abril 2024. Diretór Ezekutivu ba Fundo Desenvolvimento do Capital Humano (FDCH), Júlio Aparício akompaña husi Diretór Nasionál Koordenasaun Ezekusaun Programa Projetu no Jestaun ba Sistema informasaun (DNCEPPGSI-FDCH), Francisco da Silva Sarmento partisipa iha abertura kursu lian Indonézia (Sertifikadu Bipa) ba bolseiru selesinadu PKN-STAN na’in 15 no bolseiru selesionadu Politeknik STIS na’in 13 ne’ebé organiza husi Ministériu Finansas, iha salaun Sentru Kultural Indonezia, Mascarinhas.

Kursu BIPA osifialmente loke husi Adidu KBRI Ikfan Haris hamutuk ho Diretor Ezekutivu FDCH no Diretor Jerál Servisu Koorporativus Ministériu Finansas, Joanico Pinto, kursu refere sei halao duran fulan rua ho balun ba bolseiru rua-nulu resin walu (28) nu’udar preparasaun ba sira molok dezloka ba hala’o sira nia estudu.

Iha oportunidade ne’e Diretór Ezekutivu FDCH enkoraza bolseiru sira atu estuda no aproveita didi’ak oportunidade ne’ebé iha tanba sira ba eskola reprezenta mós estadu Timor no husu ba bolseiru sira bele hatudu prestasaun di’ak atu bele hetan klasifikasaun iha ne’eba no tenke iha valór ho prestasaun ne’ebé di’ak minímu 3.00 tuun husi ne’e haruka fila no selu osan estadu.

Programa bolsa estudu ne’e realiza ho Kooperasaun entre Ministériu Finansa Timor-Leste ho Ministériu Finansa Repúblika Indonézia no hetan finansiamentu liu husi Fundo de Desenvolvimento do Capital Humano hodi fo oportunidade ba foinsae timoroan sira ba hala’o sira nia estudu ho nivel Diploma IV iha area Kontabilidade setór publiku no Jestaun Finansa Publiku iha Jakarta Indonézia. (Média-FDCH)