Dili, 7/02/2020. Diretora Ezekutiva (DE) Fundo de Desenvolvimento do Capital Humano (FDCH) Sra. Leila Carceres dos Santos realiza enkontru jerál ho koordenadór sira no funsionáriu tomak hodi halo aprezentasaun kona-ba progresu servisu no planu programa husi kada Gabinete iha trimestre primeiru 2020 nian.
Enkontru jerál ho koordenador no funsionáriu sira ne’e hala’o iha Salaun Knowledge Center iha edifísiu FDCH , Palacio do Governu.
Iha introdusaun Diretora Ezekutiva FDCH Sra. Leila Carceres hatete atu mellora servisu iha Sekretariadu Tékniku Fundo de Desenvolvimento do Capital Humano (ST-FDCH) maka hamosu inisiativa ne’e , ne’ebé obrigatóriamente gabinete ida-idak iha ST-FDCH bele halo aprezentasaun hodi relata servisu ne’ebé mak durante ne’e halo ona, servisu atual no mós planu servisu ba fulan oin nian.
Koordenadór husi Gabinete lima iha ST- FDCH ne’ebé halo aprezentasaun ba progresu servisu no planu programa kada gabinete mak hanesan Koordenadór Gabinete do Plano Pesquisa, Fiscalisaçao e Verificação (GAPPEFIV) Sr. Hermenegildo da Silva, Koordenadór Gabinete de Gestão e Sistema de Informação (GAGESI) Sr. Henrique do Rosario, Koordenadóra Gabinete da Administração Finanças e Rekursos Humanus Internus (GAFRHI) Sra. Josefina Goncalves, Koordenadór Gabinete de Servico de Pagamento (GASEPA) Sr. Aderito Soares no koordenadór Gabinete do Aprovisionamento e Logistica (GAPLO) Sr. Eusebio Adriano Barrto.
Alende aprezentasaun husi koordenadór sira, iha mós aprezentasaun husi funsionáriu sira ne’ebé hetan oportunidade hodi akompaña viajen lori bolseiru sira ba rai-li’ur no funsionáriu sira ne’ebé hetan oportunidade ba tuir formasaun hodi eleva sira nia kapasidade tuir sira nia area servisu. (Media FDCH)