Dili, 21 Dezembru 2023. Diretór Ezekutivu ba FDCH, Júlio Aparício partisipa iha serimónia despedida ho bolseiru Fulbright-FDCH hamutuk na’in neen (6) no bolseiru The Global Undergraduate Exchange Program (Global UGRAD) na’in rua ne’ebé iha Janeiru 2024 sei dezloka ba hala’o sira ninia estudu iha universidade sira iha Estadus Unidos Amerika (EUA), iha Embaixada Amerika, Praia dos Coqueiros.
Bolsa estudu Fulbright-FDCH implementa ho parseria husi Embaixada EUA iha Dili ho Fundo de Desenvolvimento do Capital Humano (FDCH) ne’ebé FDCH sei finansia metade (partial) hodi fó oportunidade ba foinsa’e timoroan ba hala’o sira ninia estudu iha nivel lisensiatura no mestradu iha Estadus Unidus Amerika iha area importante sira hanesan Saúde Publika,Enjeñaria Matematika, Ekonomia no administrasaun públika.
Diretór Ezekutivu FDCH, Júlio Aparício agradese ba Estadus Unidos Amerika ne’ebé fó oportunidade ba foinsa’e timoroan sira hodi ba hala’o estudu iha Amerika, no enkoraza bolseiru sira atu aproveita oportunidade osan mean ne’e hodi haboot no haklean sira nia matenek no abilidade hodi fila mai kontribui fila-fali ba dezenvolvimentu rai doben Timor-Leste. FDCH nafatin iha komitmentu hodi servisu hamutuk ho Estadus Unidos hodi loke oportunidade ba timoroan sira ne’ebé matenek atu ba hala’o estudu iha Amerika.
Director of public Affairs Embaixada Amerika, Dina Braunschweig, agradese ba kooperasaun di’ak ho Governu Timor-Leste liu husi FDCH iha programa bolsa estudu Fulbright-FDCH no Estadus Unidos Amerika iha komitmentu boot atu kontinua apoiu iha dezenvolvimentu rekursus umanus Timor-Leste nian tanba liu husi investimentu ne’e bele kontribui ba dezenvolvimentu nasaun no lori moris di’ak no prosperidade ba povu.
Partisipa iha atividade despedida ne’e bolseiru sira ho nia familia, ekipa téknika husi embaixada no ekipa teknika husi Sekretariadu Tékniku-FDCH.(Média-FDCH)