Díli-16/4/2018 Secretario Executivo Fundo de Desenvolvimento do Capital Humano (FDCH) Sr. Isménio Martins da Silva partisipa iha serimónia abertura  formasaunba funsionarius oinsá halo   kalibrasaun ba kontador eletrisidade iha Timor –Leste (TL) ba tékniku na’in rua (2) hosi Direção Nacionál de Apoiu ao Consumidor -DGE.

Objetivu hosi formasaun ne’e hodi prepara operador makina kalibrasaun iha EDTL, hodi bele hahú halo kalibrasaun ba kontador tomak antes atu fo ba klientes, nune’e mós operador sira bele halo kalibrasaun ba kontador eletrisidade uainhira iha reklamasoens hosi klientes ligadu ba kustu elektrika.

Ohin loron EDTL iha kontador  modelu 2 ne’ebé eziste;  1) konvensional; uza ba empresas boot sira, (trifase ba leten),  2) kontador Prepago; uza ba komunidade.

Secretário Executivo FDCH Sr. Isménio Martins iha ninia diskursu hato’o agradesementu ba Sekretáriu Jerál Ministériu do Desenvolvimento e da Reforma Isntitucional (MDRI) ho ninia ekipa ne’ebé organiza tan formasaun ba faze segundu ne’e.

“Ha’u hato’o Agradesimentu dala ida tan ba sekretáriu Jerál ho ekipa tomak ne’ebé konsege ita organiza tan formasaun ida, hanesan bain-bain ita nia na’i ulun sira dehan ekipamentus iha seidauk to’o tanba ne’e atu iha operador di’ak presiza haforsa kualidade ita nia pesoál enjeheiru nomós ekipa tomak atu hasa’e kualidade iha ita nia servisu, ami sempre prontu no disponivel atu apoiu,” hateten Secretariu ezekutivu FDCH Sr. Isménio Martins da Silva.

Secretario Executivo FDCH Sr. Isménio Martins husu atu prepara planu hodi hatama mai iha FDCH nune’e iha tinan oin bele haree mós atu fó bolsa ba funsionáriu balun hosi instituisaun ne’e atu ba hasai sira nia espesialista iha area tékniku nian nune’e bele halo operasaun ba ekipamentu sira ne’ebé iha au mezmu tempu bele hadi’a mós bainhira ekipamentu balun avaria.

Secretário Jerál Ministerio do Desenvolvimento e da Reforma Institucional  (MDRI) Sr. Jose L.C.C. Pereira Mestre agradese ba apoiu FDCH nian hodi realiza formasaun ne’e.

“Ami agradese ba FDCH  maske ohin loron ho orsamentu duadesimo de’it maibé formasaun ne’e konsege realiza,”hateten Secretáriu Jeral MDRI Sr. Jose Pereira Mestre

Sekretariu Jeral ne’e husu ba partisipante sira atu átivu hodi husu buat ne’ebé importante no ligadu ba sira nia servisu loro loron ba formadór nune’e bele hasa’e liután sira nia koñesimentu.

Entretantu diretór DGE Sr. Jose Fernandes  informa katak formasaun ba  primeiru faze konsege fornese ona ba pesoál tékniku  na’in 5.

Maske nune’e diretór ne’e hateten formasaun loloos ba tékniku iha eletrisidade ninian atu sai espesialista presiza ho tempu mínimu fulan tolu to’o tinan ida.

Durante formasaun partisipante sira sei aprende maka’as liu kona-ba kalibrasaun ba kontadór prepagu nian nune’e bele halo kontrolu ho di’ak ba servisu eletrisidade.

Formasaun ne’ebé sei hala’o durante semana rua ne’e ho ninia partisipante ema na’in rua no treinadór ba formasaun ne’e mai hosi empreza ITRÓN Indonesia.(Media FDCH)

Related Post :


Total Viewer : 1005 Views || Category: Notisia