DÍLI- 28/07/2018 (FDCH), Koordenadór Gabinete de Gestão  do Sistema de Informacão GAGESI, Sr. Henrique do Rosário reprezenta Secretário Executivo do Fundo de Desenvolvimento do Capital Humano (FDCH) halo aprezentasaun servisu FDCH nian no prosesu oinsá atu kontinua estudu ba Indonesia iha semináriu ho tópiku “ Prosedur Melanjutkan Studi di Indonesia bagi Mahasiswa asing” ne’ebé realiza  hosi Embaixada Indonesia ba Timor-Leste iha edifísiu Pusat Budaya Indonesia Mascarinhas Dili.

Iha aprezentasaun koordenadór Sr. Henrique do Rosario informa hahú hosi ezisténsia FDCH nian iha 2011 to’o mai ohin loron bolseiru timoroan sira ne’ebé hala’o sira nia estudu iha Indonesia hamutuk 1.579, hosi númeru ne’e sira ne’ebé ohin loron sei ativu sira nia estudu hamutuk 252,  gradua ona 1.310 no kansela 17. Bolseiru timoroan ne’ebé governu haruka ba hala’o sira nia estudu iha Indonesia iha areas 132 no iha universidade 63 iha nasaun Indonesia.

Koordenadór GAGESI-FDCH ne’e aprezenta mós  kona ba prosesu no mekanizmu  bolsa estudu programa FDCH nian no nia kriterius atu hetan subsídiu ba finalista sira nomós subsídiu ba estudante sira ne’ebé atu hala’o sira nia peskiza.

FDCH enkoraza mós joven sira atu iha preparasaun ne’ebé másimu no planu ne’ebé di’ak molok ba hala’o sira nia estudu iha rai-li’ur nune’e bele atinje sira nia objetivu.

Aleinde oradór hosi FDCH iha mós oradór seluk hosi  Ministériu Edukasaun ensinu superior siénsia no teknolojia Indonesia nian Sr. Purwanto ne’ebé halo mós aprezentasaun kona-ba sistema sira ne’ebé timoroan sira tenke kumpre bainhira ba hala’o sira nia estudu iha Indonesia.

Iha faze diskusaun partisipante balun husu ba FDCH atu haree no fó asisténsia ba timoroan hirak ne’ebé hetan bolsa hosi governu bainhira remata tiha sira nia estudu fila mai seidauk hetan servisu.

Tuir observasaun partisipante sira ho entuziazmu tebes hodi rona esplikasaun kona-ba servisu fundu nian liu hosi fó subsídiu ba estudante finalista sira hodi ajuda sira finaliza sira nia estudu.

Entretantu partisipante sira iha semináriu ne’e mai hosi estudante universitariu sira iha Timor-Leste, no reprezentante universitariu sira ne’ebé partisipa iha atividade Indonesia Education Fair 2018.(Media FDCH)

Related Post :


Total Viewer : 1039 Views || Category: Notisia