Díli, 23 setembru 2022. Fundo de Desenvolvimento do Capital Humano (FDCH) koloka ona estájiariu ba programa estajiu profisionál melhores graduados husi instituisaun ensiñu superior rai-laran hamutuk estájiariu na’in 417 kompostu husi feto 220 mane 197 hodi hala’o sira nia estájiu iha instituisaun públiku no privadu hamutuk 121.
Programa estájiu profisionál ba melhores graduados ne’e realiza ho objetivu atu promove graduadu sira ne’ebé gradua ho valor di’ak liu atu asesu ba merkadu servisu iha rai-laran.
FDCH agradese ba kooperasaun di’ak husi instituisaun públiku no privadu hotu ne’ebé simu ona estájiariu sira husi FDCH hodi hala’o estájiu, hein katak foinsa’e graduadu hirak ne’e bele aproveita oportunidade ida ne’e hodi hetan esperiénsia servisu no sai hanesan bukae ba sira iha futuru.
Estajiu ba melhores graduados hirak ne’e ho durasaun fulan neen (6), durante estájiu, estájiariu sira iha direitu atu simu insentivu ka subsidiu husi Governu liuhosi FDCH kada fulan ho montante $ 150 hodi apoiu ba kustu transporte no fasilita estajiáriu sira nia nesesidade baziku loro-loron nian.
Implementasaun programa estájiu profisionál ba faze dahuluk tinan 2022 ne’e lansa ofisialmente husi Sua Exelensia Ministru Ensinu Superior, Siensia no Kultura no Prezidente CA-FDCH Sr. Longuinhos dos Santos, iha loron 1 Jullu 2022, no orsamentu ne’ebé finansia programa estájiu ne’e ho montante $ 437, 500 ne’ebé sei benefisia estájiariu 445 .
Tanba seidauk atinje vagas ne’ebé preve FDCH sei halo esforsu hodi koloka tan estajiariu hamutuk 28 ba instituisaun akolladora sira hodi kompleta vagas 445 iha tempu besik. (Média_FDCH)