Dili, 13 Janeiru 2023. Fundo de Desenvolvimento do Capital Humano (FDCH) realiza enkontru ho Liña Ministeriál (LM) no Instituisaun estadu akreditadu sira hamutuk 15 hodi aprezenta progresu ezekusaun orsamentu 2022 no distribui pakote orsamentu 2023 iha programa bolsa estudu no formasaun nian, iha salaun Knowledge Center Palácio do Governo.

Diretór Ezekutivu FDCH, Dr. Cristóvão dos Reis iha ninia introdusaun hatete, orsamentu FDCH nian ba tinan 2023 ne’ebé aprova husi Parlamentu Nasionál no hetan ona promulgasaun husi Prezidente Repúblika ho montante millaun $17.7 ne’ebé finansia programa prinsipál haat (4) hanesan; Programa Formasaun Profisonál, Formasaun Téknika, Bolsa Estudu no Programa Boa Governasaun no Jestaun Institusionál.

Diretór Ezekutivu FDCH apresia ho servisu hamutuk ne’ebé durante ne’e iha no husu nafatin ba Liña Ministérial no Instituisaun Estadu Akreditadu sira, atu ezekuta orsamentu ho kualidade tuir programa no planu ne’ebé submete ona mai iha FDCH hodi melloria kualidade rekursus umanus iha ita ninia país no subliña mós atu konsentra formasaun jeneriku sira iha rai-laran.

Orsamentu FDCH ba tinan ne’e ninia alokasaun kontinua maka’as ba iha programa bolsa estudu ne’ebé implementa husi Sekretáriadu Tékniku FDCH, hahú husi programa Bolsa Hakbi’it, Bolsa Meritu, Bolsa Parsiál no Bolsa ba Dosente universidade no instituisaun ensinu superior privadu sira.

Durante enkontru ne’e, Diretór Nasionál sira iha FDCH hanesan; Diretóra Nasionál Servisu Pagamentu (DNSP), Sra. Alexandrina da C. Viegas halo aprezentasaun kona-ba taxa ezekusaun orsamentu 2022 husi Liña Ministériál no Instituisaun Estadu Akreditadu mai FDCH, Diretór Nasionál Planu Peskiza, Monitorizasaun no Fiskalizasaun (DNPPEFIV) Sr.Moisés Soares halo aprezentasaun kona-ba planu programa sira ne’ebé realiza ona iha 2022 no Diretóra Nasionál Aprovizionamentu (DNA), Sra. Sofia M. de Jesus halo aprezentasaun kona-ba sistema aprovizionamentu iha ST-FDCH.

Hafoin aprezentasaun iha parte diskusaun diretór no pontu fokál balun sujere mós atu haforsa liután koordenasaun servisu iha parte tékniku nian entre ST-FDCH ho Liñas Ministerial no Instituisaun Estadu Akrediatdu sira hodi kontribui ba hadi’a kualidade rekursus umanus nasaun foun ne’e nian liu husi programa bolsa estudu no formasaun .

Enkontru ne’e termina ho distribuisaun pakote orsamentu 2023 husi Diretór FDCH Dr. Cristóvão dos Reis ba Diretór Jerál, Diretór Rekursus Umanus no pontu fokal sira husi liña Ministériál no Instituisaun estadu akreditadu sira ne’ebé partisipa iha eventu ne’e. (Média_FDCH)

Related Post :


Total Viewer : 67 Views || Category: Notisia