Dili,27-10-2017; Secretário Executivu Fundo de Desenvolvimento do Capital Humano (FDCH), Sr. Isménio Martins da Silva, akompana husi Coordenadora do GASEPA – Alcina Madeira, Coordenador GAGESI – Henrique do Rosario, Coordenador Interino GAPPEFIV – Filomeno R.S.Lay no mós Consultor da Pesquisa do ST-FDCH Afonso de Almeida, relata progresu servisu FDCH nian, ba Primeiru Ministru Marí Alkatiri, iha Palasíu do Governu . Sexta, 27 de Outubru de 2017 foin lalais.
“Obrigado ba exelénsia PM no xefe gabinete agradese tebes ba responde ami nia pedidu atu hasoru exelénsia tanba iha informasaun ne’ebé mak ami hakarak informa ba Exelénsia maka liu liu kona ba progresu servisu Ne’ebé mak ami iha ate a data”.hato’o Sekretáriu Ezekutivu FDCH iha enkontru ne’e.
Sekretáriu Executivo ne’e mós hato’o ba Primeiru Ministru katak iha tinan ida ne’e FDCH iha por volta $27, 2 Milhoens de dollars no iha por Volta de mais 500 aktividades formasaun inkluindu bolsa estudu, ba iha tinan ida ne’e liu-liu fahe ba iha programa prinsipais 4, ma’ak hanesan Programa formasaun profíssional ne’ebé programa ne’e aloka liu ba Sentru Formasaun hodi apoiu atividade formasaun iha Sentru formasaun, Formasaun Téknika ba funsionáriu, Programa daruak ma’ak iha mós Programa formasaun téknika ne’ebé mak espesifikamente aloka ba funsionáriu públiku sira atu nune’e bele dezenvolve sira nia kapasidade, iha programa terceira ma’ak Programa Bolsa de Estudu ne’ebé mak metade do orsamentu tinan-tinan sempre aloka bolsa estudu ho beneficiarius ba tinan ne’e besik 3 Mil bolseirus espalhadu iha 221 Universitariu ne’ebé nia nivel husi diploma 3 tantu pôz doutoradu.
Sekretáriu Ezekutivu FDCH hato’o mós katak programa bolsa estudu hatudu mós nia impaktu ne’ebé di’ak no iha benifisiariu balun agora daudaun asume mós knar nudár ministru iha VII Governu constitutional no iha mós deputadu balun ne’ebé sai mós benifisiariu.
“Iha kompozisaun membro guverno ba VII Governo Constitucional iha beneficiarios ministru 3 ne’ebé hanesan Dr. Valentim Ximenes no Dr. Fernando Hanjam husi UNTL, Dr. Manuel Vong atraves husi Ministério da Educação no deputadu Dr. Fidelis Magalhães ne’ebé hatan apoio Subsidio Individuais husi Secretariado do FDCH rasik”. Hatete Sekretáriu Ezekutivu FDCH, Sr. Isménio Martins da Silva.
Tipu formasaun ikus liu ne’ebé FDCH iha mak tipu formasaun seluk (Outros Tipos de Formação), ne’ebé mak foka liu ba iha area justisa, defeza no seguransa.
FDCH la’ós de’it fó apoiu ba setór públiku, maibé tuir Sekretáriu Ezekutivu FDCH katak, durante ne’e, FDCH fó mós apoiu ba setór Não Públiku (públiku timor oan) sira liu husi sentru formasaun sira. FDCH mós apoiu atribui bolsu estudu la’ós de’it ba funsionáriu públiku sira maibé mós ba povu timór oan sira.inkluido veteranu nia oan sira.
“Durante ne e liu husi FDCH fó de’it subsídiu individuais signifika katak timór oan ida iha direitu para atu hetan apoiu subsídiu dala ida de’it ba ninia estudu. Ne’ebé total durante nee iha mais de besik 5000 indivíduu ne’ebé mak konsege hetan benefísiu husi parte husi ita nia 4,000 bolseirus ne’ebé mak liu husi prosesu konkursu e total hotu ne’ebé mak 8,000 resin”. Hateten Sekretáriu Ezekutivu FDCH, Sr. Isménio Martins da Silva iha Enkontru ne’e.
Iha enkontru ho Primeiru Ministru S.E. Dr. Marí Alkatiri ne’e, Sekretáriu Ezekutivu FDCH hamutuk ho ekipa, aprezenta mós kona ba progresu servisu FDCH nian, liga ba programa “Levantamentu Dadus Rekursus umanus ezistentes iha Timor-Leste ne’ebé hahu iha fim de 2016 nian, no halo ona mapamentu ba setór públiku atu identifika áreas prioridade ne’ebé mak bele forma hahú husi 2016-2030 segundu PEDN tama fase atu reforsa rekursu umanu.
“FDCH mós halo levantamentu ho tipu de census, atu hodi bele haree, rekursus umanus ezisténsia iha rai laran, no agora daudaun ita nia progresu ba levantamentu dadus rekursu umanus ezistentes ne’e ne, ita iha faze final iha tinan kotuk, ida ne’e mak ami sei aprezenta ba sua exelénsia, iha nia sumariu iha folder laran poi’s ami mós sei solisita mós sua exelénsia ninia orientasaun, katak ami hakarak falun metin dadus ne’e poi’s sua exelénsia bele orienta liu tan antes ita atu publika relatóriu ne’e, ami prontu atu halo apresentasaun ba iha sua exelénsia ou ba iha konselhos ministru atu nune’e bele hetan tan orientasaun polítika mais klaru”. Hato’o Sekretáriu Ezekutivu, FDCH Isménio Martins da Silva, iha Enkontru ho Primeiru Ministru.
Iha enkontru ida ne’e sita mós kona ba baze legal FDCH nian, ne’ebé kria bazeia ba artigu 32 husi Lei n.13 de 2009 kona ba orsamentu no jestaun finanseira, no hetan aprovasaun husi Parlamentu Nasionál através husi Lei n. 1/II, 14 fevreiru, artigu 9֯ husi orsamentu jerál Estado ba 2011.
“Fundu regula husi conselho administrasaun ida ne’ebé xefia husi prezidente conselho administrasaun husi parte governu konstituisional husi primeiru ministru lidera diretamente e depois mai fali 6 kontitusional nafatin ho Sr. Kayrala Xanana Gusmão maibé nudár Ministru MPIE iha ninia membru permanentes 5 hanesan Ministériu das Finansas, Ministériu da Justisa, Ministériu do Petroleum & SEPFOPE. Iha mós Sekretáriu executivu para atu tau matan ba sekretária Tékniku“. Katak Sekretáriu Ezekutivu FDCH iha Enkontru ne’e.
Sekretáriu Tékniku FDCH lidera husi Sekretáriu Ezekutivu ida, no kompostu husi gabinete nomeasaun na’in Lima (5), mak hanesan Gabinete do Plano, Pesquisa, Fiscalização e Verificação (GAPPEFIV), Gabinete dos Serviços de Pagamentos (GASEPA), Gabinete de Aprovizionamentu e Logística (GAPLO), Gabinete de Gestão do Sistema de Informação (GAGESI), Gabinete Administração, Finanças e Recursos Humanos Internos (GAFRHI), no mós equipa assessorial téknika sekretáriu nian.
Hafoin rona tiha apresentasaun husi Sekretáriu Ezekutivu FDCH, Sr. Isménio Martins da Silva, S.E. Dr. Primeiru Ministru Mari Alkatiri hatete katak agora tuir ba kompeténsia Conselho Administração, ne’e mai husi Lei orgánika do Governo, no grafikamente prontu ona, iha tersa ga kuarta, oin mai ne’e S.E. Dr. Primeiru Ministru hakarak aprova ninia unidade dekretu lei para atu haruka ba Prezidente Repúblika atu bele promulga.
“Buat sira ne’ebé uluk iha ministru planeamentu investimentu Estratéjiku eziste, hanesan infrastrutura, fundu capital umanu, ne agora mai hotu primeiru ministru, tenke iha ona dekretu lei ida par bele, tenke iha lei orgánika par bele define, ne mai hotu primeiru ministru, menus planu mak ba finansa, tanba agora ministériu ne Laos finansa nia, tanba Plano ne iha Ministériu Plano e Finansas, buat seluk sira mai hotu gabinete primeiru ministru, koordenasaun ekonómika, buat sira ne hotu gabinete primeiru ministru”. Hatete Primeiru Ministru Dr. Mari Alkatiri, iha Enkontru ne’e.
Kona-ba se mak atu asume kargu nudár Prezidente Conselho Administração no Estrutura CA-FDCH nian, tuir primeiru Ministru katak, lei orgánika governu sei aprezenta ba Presidente da Repúblika iha Tersa, 31 de Novembru 2017 atu Promulgada no publika, no hotu-hotu sei hatene klaru se mak sai prezidente CA-FDCH, se mak atu sai vice prezidente ne klaru ona.
Iha oportunidade ne’ebé hanesan Sekretáriu Ezekutivu FDCH, aprezenta mós ba Primeiru Ministru kona ba Taxa de Ezekusaun Orsamentu FDCH ate Terseiru Trimestre, ko’alia mós kona ba projesaun orsamentu FDCH nian ba iha tinan 2018,rona tiha apresentasaun ida ne’e, Primeiru Ministru hato’o katak, antisipa hela semana oin mai atu haruka ona orsamentu rektifikativu ba parlamentu nasionál.
“Ha’u prepara hela, prepara hela rektifikativu, e komesa prepara ona orsamentu to 2018 La’ós kestaun tékniku maibé kestaun polítika, teknikamente preparadu para atu aprezenta, kestaun polítika mais tenke halo jestaun didi’ak”. Hateten Primeiru Ministru Mari Alkatiri iha Enkontru ida ne’e.
Alein de ko’alia kona ba asuntu Sumáriu Programa FDCH nian, Base Legal FDCH, Taxa de Ezekusaun Orsamentu FDCH ate Terseiru Trimestre, Projeção orsamentu FDCH nian ba iha tinan 2018, no Rezumu Benefisiarius FDCH tinan 2011-2017, iha enkontru ne’e Sekretáriu Ezekutivu FDCH Isménio Martins da Silva ho Equipa entrega mós dokumentu importante sira ne’ebé produz husi FDCH ba iha Primeiru Ministru S.E. Dr. Marí Alkatiri, dokumentus hirak ne’e mak hanesan, Relatóriu Avaliasaun Programa FDCH, Livru Mapeamentu Rekursu Umanu, Guiao Bolsa no Formasaun, inklui Bulletin FDCH. (Media FDCH)