Díli,01/03/2019, Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva simu ekipa ida ne’ebé lidera hosi Sra. Elsa husi  Universitas Gadja Mada (UGM) iha ninia servisu fatin, resintu Palácio do Govern, Díli.

Iha soru-mutu ne’e, parte UGM husi Fakuldade Medisina, Saúde Públiku no Enfermjen Sra. Elsa informa ba Sekretáriu Ezekutivu FDCH Sr. Isménio Martins da Silva kona-bá atu bele tulun hodi sosializa programa rekrutamentu ba timoroan ne’ebé hakarak kontinua estudu iha universidade públiku ne’ebé lokaliza iha Yogyakarta-Indonesia.

“Ami mai atu husu FDCH nia apoiu para bele sosializa programa rekrutamentu ba timoroan sira karik hakarak kontinua sira nia estudu iha UGM,” tenik Sra. Elsa iha ninia introdusaun.

Xefe ekipa ne’e mós salienta katak program hanesan ne’e (overview) parte universidade hala’o ona durante periódu tolu ho nasaun sira husi viziñu Indonesia nian. Tanba ne’e ba periodu dahaat tuir mai, sira hakarak simu mós estudante timoroan ho kategoria bolsa-estudu no privada.

“Programa ne’e ami la’o ona dala tolu, agora ba dala haat ne’e ami hakarak involve mós estudante husi Timor-Leste” hatete Xefe Ekipa husi UGM ne’e.

Hatán ba ida-ne’e, Sekretáriu Ezekutivu FDCH Sr. Isménio Martins da Silva promete sei sosializa programa refere ba timoroan hotu liuhusi koordenasaun ho Ministériu Saúde.

“Nu’udar instituisaun ne’ebé servisu ba ida-ne’e, ami sei koordena ho Ministériu Saúde kona-bá sira nia programa prioridade ligadu ho asuntu ida-ne’e,” Tenik lideransa FDCH ne’e.

Iha biban hanesan, Sekretáriu Ezekutivu FDCH koordena kedas ho Adidu Edukasaun Indonesia iha Timor-Leste Sr. Sedercor Melatunan atu oinsá bele apoiu atu fasilita fatin ba prosesu Rekrutamentu ida-ne’e.

Soru-mutu durante minutus 45 ne’e marka prezensa mós hosi Koordenadór GAPPEFIV-FDCH Sr. Filomino dos Santos, Sra. Francisca Imaculada, Adidu Edukasaun Indonesia Sr. Sedercor Melatunan, ho delegasaun husi Fakuldade Medisina, Saúde Públiku no Enfermajen, Universitas Gadja Mada. (Mídia FDCH)

Related Post :


Total Viewer : 836 Views || Category: Notisia