Dili, 05 Dezembru 2023. Governu liuhusi Ministériu Planeamentu no Investimentu Estratéjiku (MPIE) no Fundo de Desenvolvimento do Capital Humano (MPIE) realiza serimónia despedida ho bolseiru bolsa Merito hamutuk na’in sanulu resin-neen (16) no bolsa dosente husi universidade privadu na’in (13) ne’ebé iha tempu besik sei dezloka ba hala’o sira ninia estudu iha nasaun Brazil, iha Salaun City 8, Manleuana, Has Laran.

Bolseiru sira sei ba hala’o estudu ho nivel lisensiatura (S1) hamutuk na’in sanulu resin-haat (14) Mestradu (S2) na’in sanulu resin-rua (12) no Doutoramentu (S3) na’in tolu (3), iha area estratéjiku sira hanesan Enjeñaria sivil, Enjeñaria Eletrika, Enfermajen, Psikologia, Edukasaun, Kimika, Komunikasaun Sosiál no Letras.

Ministru MPIE no Prezidente CA-FDCH, Sua Exelensia Eng. Gastão Francisco de Sousa husu ba bolseiru sira atu matein disiplina tanba sira sei reprezenta povu no nasaun Timor Leste iha Brazil no husu bolseiru sira atu estuda ho di’ak nune’e, bele termina estudu tuir kontratu ne’ebé estabelese hodi fila mai kontribui ba dezenvolvimentu Timor-Leste.

Diretór Ezekutivu FDCH, Júlio Aparício aprofunda tan katak bolseiru sira sai hanesan esperansa ba povu no rai ida ne’e, ami hotu iha esperansa katak tinan haat ka tinan lima mai ita boot sira mak sai naroman no matadalan ka sai masin no naroman ba povu Timor-Leste tanba ne’e husu ba bolseiru sira atu deskobre buat di’ak tomak iha bolseiru sira nia –an koloka no utiliza iha estudu no esforsu tomak, maske sei hasoru dezafiu no fallansu barak maibe firme nafatin hodi hasoru ho aten brani hodi hetan buat ne’ebé ita hotu hakarak.

Reprezenta bolseiru Júlia Maria Orleans da Silva lori kolega bolseiru sira nia naran agradese ba Governu liu husi MPIE, FDCH no Ministériu Ensinu Superior Siensia no Kultura (MESCC) no inan aman sira ba apoiu no tulun sira durante ne’e.

Partisipa iha serimónia despedida ne’e Embaixador Brazil ba Timor Leste, Mauricio Medeiros de Asis, Ministra Konseleira Embaixada Brazil, Asesor sira husi MPIE, Reitór husi Instituisaun ensinu superior, universidade privadu no inan aman bolseiru sira.

(Média-FDCH)