Dili, 31 Jullu 2023. Sua Exelensia Ministru Planeamentu Investimentu Estratéjiku (MPIE), Sr. Gastão de Sousa halo vizita mai edifisiu Sekretariadu Tékniku Fundo de Desenvolvimento do Capital Humano (ST-FDCH) hodi realiza enkontru dahuluk ho Diretór Ezekutivu Fundo de Desenvolvimento do Capital Humano (FDCH), Dr. Cristóvão dos Reis ho estrutura sira hanesan Diretór Nasionál sira, Xefe Departamentu no funsináriu sira ne’ebé hala’o knar iha instituisaun ne’e.
Iha oportunidade ne’e, Sua Exelensia Ministru hatete kontinua depozita konfiansa ba lideransa no estrutura atual hodi kontinua hala’o servisu no iha tempu besik sei halo alterasaun ba dekretu lei regulamentu FDCH nian tanba antes ne’e FDCH tutela iha Ministériu Ensinu Superior Siénsia no Kultura (MESCC).
Diretór Ezekutivu FDCH, Dr. Cristóvão dos Reis agradese ba Exelensia Ministru nia disponiblidade hodi halo vizita mai ST-FDCH nune’e, bele realiza enkontru dahuluk ho estrutura no funsionáriu sira hafoin lei organika Governu nian públika.
Tuir lei organika Governu Konstitusionál da-sia (IX), Sekretariadu Tékniku-FDCH tutela iha Ministériu Planeamentu Investimentu Estratéjiku (MPIE) ne’ebé lidera husi Sua Exelensia Ministru Gastão de Sousa. (Média-FDCH)