DILI,23/06/2017(FDCH) Diretór Jerál  Instituto Nacional da Administração Pública (INAP) Sr,  Agostino Letencio preokupa ho partisipasaun funsionáriu públiku sira nian ba kursu  sira ne’ebé hala’o iha rai laran mínimu tebes.

Kursu Indusaun obrigatóriu ba funsionáriu públiku rekrutadu 2013-2015  ne’ebé organiza husi INAP no hetan apoiu finansiamentu husi Fundo de Desenvolvimento do Capital Humano (FDCH) ne’e tuir tarjetu fornese ba funsionáriu públiku 500 ne’ebé fahe ba faze rua faze primeiru ba ema na’in 250 maibé partisipa de’it husi  funsionáriu na’in 133 no faze daruak nian 250 maibé partisipa de’it husi 114.

“Funsionáriu hotu-hotu kuandu temi formasaun iha rai li’ur, ita aprova de’it na’in rua sei mai husu tan na’in rua ba tan bele ka lae, maibé kursu iha rai laran ita fó ba ema na’in 4 na’in rua de’it mak mai,” hateten Sr,  Agostino Letencio iha serimonia enserramentu ba formasaun ne’e iha salaun Esperansa Aimutin.

Diretor Jeral ne’e preokupa ho partisipasaun funsionáriu sira ba kursu ne’e tanba alokasaun orsamentu ba preparasaun matéria sira formasaun nian ba ema na’in  500 maibé realidade hatudu partisipasaun funsionáriu  metade de’it signifika osan ne’ebé aloka ba sosa material sira hodi prepara ba formasaun ne’e barak maibé la utiliza.

Husu mós ba funsionáriu públiku sira atu labele fó sala ba governu kuandu iha futuru atu kompleta dokumentu ruma maibé presiza hatudu sertifikadu kursu indusaun obrigatóriu.

“Aban bainrua iha ezije dokumentus balun ami labele asina de’it, ita asina ba ema ne’ebé tuir tiha ona kursu ne’e, no ema balun fó sala ba governu, dala ruma oportunidade hanesan ne’e sira la tuir sira ezije fali iha aban bainrua,” hateten tan Diretór Jeral ne’e.

Entretantu Koordenadór Gabinete Gestaun no Informasaun (GAGESI) Sr. Henrique do Rosario  ne’ebé reprezenta Secretario Executivo FDCH Sr. Ismenio Martins da Silva  partisipa iha serimónia enserramentu ba formasaun ne’e  fó parabéns ba formandu sira tanba kompleta ona formasaun ne’ebé governu oferese hodi hasa’e liután  sira nia koñesimentu no abilidade servisu bainhira sai hanesan servidor públiku no servidor estadu.

FDCH prontu atu aloka maka’as liu-tan orsamentu  ba iha formasaun sira  iha rai laran tanba bele hamenus gastus kompara ho formasaun iha rai li’ur tanba ne’e ohin loron komesa halo ona diskusaun ho INAP no KFP atu haree ba formasaun iha rai laran no rai li’ur tenke iha balansu..

“Se mak  simu sertifikadu indusaun ne’e nia mak merese sei tuir formasaun ne’ebé Fundu dezenvolvimentu kapitál umanu  karik oferese iha tinan oin mai, ha’u hakarak fó parabéns ba ita boot sira ne’ebé remata ona formasaun,  ba ami ida ne’e mak sai hanesan xave ba ita bainhira sai hanesan funsionáriu públiku,” dehan Sr. Henrique do Rosario

Iha diskursu koordenadór  ne’e fahe mós informasaun ba funsionáriu sira kona-ba  ejistensia FDCH nian no ninia servisu ne’ebé FDCH halo  durante ne’e.

Funsionáriu sira ne’ebé tuir kursu indusaun ne’e mai husi funsionáriu sira ne’ebé hala’o knar hanesan servidor estadu iha instituisaun estadu hanesan Ministeriu sira no ajénsia estadu nian, serimonia enseramentu ne’e taka ho fahe sertifikadu simbolikamente ba formandu na’in rua.(Media FDCH )

Related Post :


Total Viewer : 825 Views || Category: Notisia