Dili, 19/02/2019, Sekretáriu Estadu Formasaun Profisionál no Empregu (SEFOPE ) Sr. Julião da Silva  no Sekretáriu Ezekutivu Fundo Desenvolvimento do Capital Humano (FDCH ) Sr. Isménio Martins da Silva  asina Memorandum of Understanding (MoU) ho Prezidente  Korean Studies and Languages Program (KSLP) Sr. Lee Jae Kwon iha salaun Knua Buka Hatene SEFOPE – Caicoli Dili .

Liu hosi asina  MoU ne’ebé governu ho KSLP estabelese ho objetivu atu reativa fila-fali formasaun lian Koreia  ba timoroan sira, hafoin formasaun lian Koreia ne’e paradu tiha durante  tinan ida.

Tuir planu formasaun lian Koreia  hodi prepara timoroan sira ba servisu iha Koreia sei hahú iha fulan Marsu tinan ne’e, no tuir akordu ne’ebé iha durante tinan 2019 benfisiáriu ba formasaun ne’e sei atinje 2.000  to’o 2.500 .

Entretantu orsamentu ne’ebé finansia liuhosi FDCH hodi realiza programa formasaun ne’e durante tinan ida ho montante 824, 400.00. orsamentu ne’e sei selu  kada fulan ne’ebé sei kobre saláriu ba formadór sira, kustu transporte, Akomodasaun, operasaun ba formasaun no kustu administrasaun no kustu jestaun sira seluk.

Sekretáriu  Estadu Formasaun Profísionál no Empregu SEFOPE , Julião da Silva hatete akordu kooperasaun ne’ebé governu Timor-Leste halo ho KSLP hahú kedas iha 2012.

“Akordu kooperasaun ho KSLP ita hahú kedas iha 2012, tan ne’e ohin ita hahú fila-fali hodi fó kapasitasaun lian Koreia nian ba Timoroan sira,” dehan Sekretáriu Estadu ne’e

Tuir planu formasaun ne’e sei hahú  iha inísiu fulan Marsu no Governu sei haree fatin formasaun ne’ebé apropriadu nune’e númeru timoroan sira ne’ebé partisipa iha formasaun bele aumenta barak liután.

Entretantu Secretario Executivo Fundo de Desnvolvimento do Capital Humano (FDCH) Sr. Isménio Martins da Silva kongratula SEFOPE ba iha servisu ne’ebé hala’o tan iha tinan ida ne’e maibé husu atu reve mós programa formasaun lian Koreia ne’e.

“Uluk nana’in hakarak kongratula SEFOPE ba servisu ne’ebé hala’o tan iha tinan ida ne’e, depois de tinan ida ita vakum, no liuhosi negosiasaun ne’ebé todan ho KSLP, tanba ita iha númeru ne’ebé ejistente ne’e 7.500 , ne’ebé ha’u ko’alia ho Sekretáriu Estadu katak 7.500 ne’ebé tuir ona kursu  lian Koreia ne’e   ita tenke reve, talves ho osan ne’ebé iha, ita halo fali refresh course ou teste ruma para ita bele reve programa ne’e,” hatete Sr. Isménio Martins

Sekretáriu Ezekutivu FDCH hatete atu promove Timor-Leste ninia sósiu ekonómiku liuhosi hasa’e númeru empregu FDCH iha ninia papél importante tebes atu apoiu nafatin programa SEFOPE.

Durante ne’e FDCH distribui ona orsamentu ho montanter $ 4 mill resin hodi finansia programa formasaun lian Koreia ba Timoroan sira hodi prepara timoroan ba servisu iha rai li’ur liu-liu iha nasaun Koreia.  (Media FDCH)

 

Related Post :


Total Viewer : 784 Views || Category: Notisia