Dili,12/04/2017 (FDCH) Secretariadu Estadu Polítika Formasaun Professional no Empregu (SEPFOPE) ho Fundo de Desenvolvimento do Capital Humano (FDCH) ofisilamente selebra serimonia asina akordu ho benefisiariu  na’in 250 ne’ebé hetan ona formasaun iha sentru formasaun sira  hodi ba hala’o estájiu durante fulan neen iha instituisaun governu no setór privadu sira.

Estajiáriu  ne’ebé kompostu husi mane 125 no feto 125 ne’e hetan ona formasaun husi sentru formasaun akreditadu sira tuir sira nia area ida-idak hanesan area konstrusaun jerál, automotive, ospitálidade, Agrikultura,  IT, refijerasaun no administrasaun .

Iha serimónia asina akordu entre estajiáriu sira ho empregador, SEPFOPE no FDCH  iha Sala  Knua Buka hatene Kaikoli, Secretáriu Estadu SEPFOPE, Ilidio Ximenes husu ba timoroan hirak ne’e atu hatudu sira nia kapasidade,  badinas no disiplina iha fatin ne’ebé sira estájiu ba.

“Ida ne’e parte ida depois imi hetan teoria imi nia pratika ne’e oinsá, agora hanesan kilat karik imi ba komesa tiru malu, ba iha servisu fatin sira ne’e atu hatudu imi nia abilidade imi nia skill imi nia matenek saida mak imi hetan,” Tatoli sekretáriu estadu ne’e ba estajiáriu sira.

Sekretáriu estadu Sr, Ilidio Ximenes  rekoñese mós katak dala barak formasaun fó tiha ba timoroan sira maibé seidauk orienta ba merkadu ninia nesesidade tanba haree ba  indústria iha nasaun foun ne’e nian ne’ebé  sei menus tebe- tebes.

Secretáriu Executivo FDCH Sr, Isménio Martins da Silva, apresia ho servisu SEPFOPE nian tanba fó tan pasu importante ida hodi ba kontr  ibui ba dezenvolvimentu rekursu umanu iha nasaun foun ne’e nian.

“Ha’u hakarak kongratula dala ida tan ba Secretáriu estadu ho kolega sira iha SEFPFOPE ne’ebé fó tan pasu importante ida   ba kontribuisaun dezenvolvimentu rekursus umanu iha timór laran  ne’ebé Fundo de Desenvolvimento  do Capital Humano servisu besik ho SEPFOPE ho ministériu hotu-hotu atu garantia kualifikasaun timoroan sira nian  inkluidu    asegura depois de formasaun,”dehan  Sr,Isménio Martins

Sectretário Executivo Isménio Martins hateten   estájiu hanesan pillar importante atu bele garantia empregabilidade, tanba ne’e tenke servisu hamutuk ho komponente hotu-hotu liu-liu ho setór privadu sira no empregador sira.

 “Estájiu bele hamosu empregabilidade, tuir dadus ne’ebé SEPFOPE iha tinan kotuk oitu  porsentu agora iha onje  porsentu empregabilidade, signifika ita boot sira ne’ebé atu ba estájiu sei hetan oportunidade atu hetan empregu,” dehan tan Secretario Executivo Ismenio Martins.

Entretantu Diretór SEPFOPE Paulo Alves hateten estajiáriu sira ne’ebé asina kontratu atu ba halo estájiu mai husi munisipiu 9 no sei iha munisipiu rua no Rejiaun Administrativa Espesiál Oe-Cusse Ambeno mak seidauk tanba dokumentu tama tarde nune’e sira nia dokumentu sei iha hela faze avaliasaun.

Husu ba estudante sira atu aproveita oportunidade durante fulan neen nia laran atu halo estájiu nune’e remata estájiu kompañia bele kontinua fó servisu ba sira.

Tuir dadus ne’ebé SEPFOPE iha hahú husi 2012 -2016 timoroan hamutuk 3059 ne’ebé remata tiha formasaun konsege ba hala’o estájiu iha istitusisaun governu no setór privadu maibé sira ne’ebé hetan servisu hamutuk de’it 349 no husi 2710  seidauk hetan servisu no  husi númeru ne’e barak liu iha area administrasaun.(Média FDCH )

Related Post :


Total Viewer : 1014 Views || Category: Notisia